Welcome & Course Overview

Forex Fundamental Analysis Mastery 

Assalamu Alaikum warahmatullahi wabarakatuh, and a very warm welcome to **’Forex Fundamental Analysis Mastery.’** Mein hun Muhammad Shahid Memon, aur aglay 5 minutes mein mein aapko is pooray course ka woh roadmap dikhaon ga jo aapko financial markets ki *asli* samajh day ga.

Yeh course sirf Forex tak mehdood nahi hai. Ye aapko woh framework day ga jis say aap **Forex, Stocks, Commodities, aur Index markets** ko ek professional ki nazar say dekh saken ge. Aaj shuruat mein, hum yahin say samjhen ge: Fundamental Analysis aakhir hai kya?”

“Pehla sawal: Yeh course kis k liye hai? Mere hisab say yeh teen logon k liye zaroori hai.

**Number 1:** Complete Beginners. Agar aap ko lagta hai k ‘Non-Farm Payroll’ koi zameen ka tukda hai ya ‘Interest Rate Decision’ sirf bank ka kaam hai, to aap bilkul sahi jagah hain. Hum sifarish say shuru karen ge.

**Number 2:** Intermediate Traders. Jo technical analysis to karte hain lekin kabhi kabhi market bilkul ulat chalti hai news par, aur aap ka stop loss hit ho jata hai. Ye course aap ko woh context day ga k *kyun* aisa hota hai.

**Number 3:** Advanced Traders. Jo professional level ki market ki gehri samajh hasil karna chahte hain, ta k un ka analysis sirf charts tak na rehjay, balki unhein pata ho k badi institutions kis soch say trade lagati hain.

Is course ka maqsad andazon aur qasmon par trading nahi sikhana. Yeh ek **logic-based, macro-driven approach** hai. Jaise kisi mulk ki economy ki janch partal ki jati hai, waise hi hum trading karen ge.”

“To aap is course mein kya seekhen ge? Chaye bundein:

**1. Currencies Kyun Uparti Aur Girti Hain?** Koi currency strong kyun hoti hai? Sirf speculation nahi… balki us mulk ki economic health, us ki interest rates, aur global demand par in sab ka asar.

**2. Central Banks Markets Ko Kaise Chalati Hain?** Ye dunya ki sab se taqatwar institutions hain. Jab Federal Reserve ya State Bank of Pakistan boltay hain, markets kaan lagaa kar sunti hain. Hum seekhen ge in ki policy, in k faislon ko kaun se data inspire karta hai, aur in ki zaban kaise parhi jati hai.

**3. Economic News Ko Sahi Tareeqay Say Kaise Parhein?** Aik number aata hai… positive hai. Lekin market gir jaati hai! Aisa kyun? Hum seekhen ge k news ko ‘actual’ vs ‘forecast’ vs ‘previous’ k context mein dekhna kya hota hai. Surprise factor kya hota hai.

**4. Institutions Fundamentals Istemal Kar Ke Kaise Trading Karti Hain?** Hedge funds, banks, investment firms… yeh sab fundamental analysis par croreon rupay lagati hain. Un ka timeframe, un ki strategy, aur aap un k rang mein rang kar kaise soch saktay hain.”

“To is sab ka anjam kya hoga? Course k end tak, aap ki trading mein yeh farq aana chahiye:

**Aap ek Clear Market Bias Bana Pao Ge.** Har haftay, har mahinay, aap ko pata hoga k overall picture kya keh rahi hai. Dollar strong honay wala hai ya weak? Risk-on environment hai ya risk-off?

**Aap Emotional News Trading Say Bach Pao Ge.** Breaking news aati hai aur log ghabra kar buy ya sell kar dete hain. Aap nahi karen ge. Aap pause karen ge, context mein dekhen ge, aur phir disciplined trade lagayen ge.

**Aap Confidence aur Discipline Say Trading Kar Pao Ge.** Confidence aisi cheez nahi jo aap andazon say hasil karen. Confidence aata hai jab aap ko pata ho k aap kya kar rahe hain aur kyun kar rahe hain. Jab aap ko market ki underlying story samajh aa jati hai, to her chart, her candle, her movement ka zyada matlab ban’ne lagta hai.”

“To yeh tha hamara roadmap. Ab shuruat karte hain. Aglay video mein hum sab se pehla aur aham sawal tackle karen ge: **”Fundamental Analysis Waqai Hai Kya?”** Ye sirf news parh’ne ka naam nahi, balki economics, geopolitics, aur market psychology ka mukamal jungle hai. Us mein ghus’tay hain.

**Shukriya. Allah Hafiz.”**